യുവനടിയും ടെലിവിഷൻ താരവുമായ സഞ്ചിത ഉഗാലെയുടെ അപ്രതീക്ഷിത വിയോഗത്തിൽ നടുങ്ങി സോഷ്യൽമീഡിയ. മുംബൈ നളസോപാരയിലെ സ്വന്തം വസതിയിലാണ് സഞ്ചിതയെ തൂങ്ങിമരിച്ച നിലയിൽ കണ്ടെത്തിയത്. ജൂൺ 14-നാണ് ഈ സംഭവം നടന്നത്. സംഭവത്തെക്കുറിച്ച് മുംബൈ അച്ചോലെ പോലീസ് ഇൻക്വസ്റ്റ് നടപടികൾ പൂർത്തിയാക്കി വിശദമായ അന്വേഷണം ആരംഭിച്ചിട്ടുണ്ട്. മരണത്തിലേക്ക് നയിച്ച കൃത്യമായ കാരണങ്ങൾ എന്താണെന്ന് കണ്ടെത്താനുള്ള തീവ്രശ്രമത്തിലാണ് അന്വേഷണ ഉദ്യോഗസ്ഥനായ വിനോദ് ബാഗിന്റെ നേതൃത്വത്തിലുള്ള പോലീസ് സംഘം.
ടെലിവിഷൻ പ്രേക്ഷകരുടെ പ്രിയപ്പെട്ട പരമ്പരയായ ‘കുങ്കും ഭാഗ്യ’യിലൂടെയാണ് സഞ്ചിത ഏറെ ശ്രദ്ധിക്കപ്പെട്ടത്. തന്റെ കരിയറിലെ ഏറ്റവും പ്രധാനപ്പെട്ടതും തനിക്ക് ഏറെ ആത്മവിശ്വാസം നൽകിയതുമായ വേഷമായാണ് സഞ്ചിത ഈ സീരിയലിലെ കഥാപാത്രത്തെ എപ്പോഴും വിശേഷിപ്പിച്ചിരുന്നത്. ‘കുങ്കും ഭാഗ്യ’യ്ക്ക് പുറമെ ‘സജൻ ഘർ’, ‘ഡിൽവാലി ദുൽഹ ലേ ജായേഗി’, ‘വാഗ്ലെ കി ദുനിയ’ തുടങ്ങിയ നിരവധി ജനപ്രിയ പരമ്പരകളിലൂടെയും സഞ്ചിത മലയാളികൾ അടക്കമുള്ള പ്രേക്ഷകർക്ക് സുപരിചിതയായിരുന്നു.
മിനിസ്ക്രീനിൽ മാത്രമല്ല, വെള്ളിത്തിരയിലും ചുരുങ്ങിയ കാലം കൊണ്ട് തന്റേതായ ഇടം കണ്ടെത്താൻ സഞ്ചിതയ്ക്ക് സാധിച്ചിരുന്നു. വിക്കി കൗശൽ പ്രധാന വേഷത്തിൽ എത്തുന്ന ചരിത്ര സിനിമയായ ‘ഛാവ’യിൽ താരാബായി എന്ന ശക്തമായ കഥാപാത്രത്തെ അവതരിപ്പിച്ചത് സഞ്ചിതയായിരുന്നു. വ്യത്യസ്തമായ കഥാപാത്രങ്ങളിലൂടെ കരിയറിൽ തിളങ്ങിനിൽക്കുന്ന സമയത്തുള്ള നടിയുടെ ഈ വിയോഗം സഹപ്രവർത്തകർക്കും ആരാധകർക്കും വിശ്വസിക്കാനായിട്ടില്ല.
മരണത്തിന് തൊട്ടുമുമ്പ് സോഷ്യൽമീഡിയയിൽ സഞ്ചിത പങ്കുവെച്ച റീൽ വീഡിയോ ഇപ്പോൾ ആരാധകരെ കൂടുതൽ സങ്കടത്തിലാഴ്ത്തുകയാണ്. ഒരു പാട്ടിന് അതീവ സന്തോഷവതിയായി നൃത്തം ചെയ്യുന്ന വീഡിയോയാണ് മരണത്തിന് മണിക്കൂറുകൾക്ക് മുൻപ് താരം സോഷ്യൽ മീഡിയയിൽ പോസ്റ്റ് ചെയ്തത്. ജീവിതത്തിൽ ഇത്രയധികം സന്തോഷം പ്രകടിപ്പിച്ച താരം എന്തിനാണ് ഇങ്ങനെ ഒരു കടുംകൈ ചെയ്തതെന്ന ചോദ്യം ബാക്കിയാകുന്നു. പ്രിയ താരത്തിന്റെ അപ്രതീക്ഷിത വിയോഗത്തിൽ സിനിമാ-സീരിയൽ രംഗത്തെ പ്രമുഖരും ആരാധകരും അഗാധമായ ദുഃഖം രേഖപ്പെടുത്തി.
