വിജയ്യും സ്റ്റാലിനും ഒരേ ഫ്രെയിമിൽ; അനിരുദ്ധ്–കാവ്യ വിവാഹസത്കാര ചിത്രങ്ങൾ സോഷ്യൽ മീഡിയയിൽ വൈറൽ!

ചെന്നൈ: അനിരുദ്ധ് രവിചന്ദറിന്റെയും കാവ്യ മാരന്റെയും വിവാഹ സത്കാരത്തിൽ തമിഴ്നാട് മുഖ്യമന്ത്രി വിജയ് പങ്കെടുത്തു. എം.കെ. സ്റ്റാലിൻ, രജനികാന്ത് എന്നിവർക്കൊപ്പം വിജയ് നിൽക്കുന്ന ചിത്രവും സൺ ഗ്രൂപ്പ് പുറത്തുവിട്ടിട്ടുണ്ട്. തെരഞ്ഞെടുപ്പ് വിജയത്തിന് ശേഷം ഇവരെല്ലാം ഒരേ ഫ്രെയിമിൽ ആദ്യമായാണ് ഒന്നിക്കുന്നത്. കലാനിധി മാരനും സൺ ഗ്രൂപ്പ് പങ്കുവെച്ച ചിത്രത്തിലുണ്ട്.
അതേസമയം, ആകർഷകമായ വസ്ത്രധാരണത്തിലൂടെ കാവ്യ മാരൻ സത്കാരത്തിൽ ശ്രദ്ധ നേടി. സൺറൈസേഴ്സ് ഹൈദരാബാദ് സഹ ഉടമയായ കാവ്യ, സൂക്ഷ്മമായ ലെയ്സ് മാതൃകയിലുള്ള പുഷ്പാലങ്കാരങ്ങളോട് കൂടിയ ചുവന്ന എ-ലൈൻ സ്കർട്ടും ഫുൾസ്ലീവ് ടോപ്പുമാണ് ധരിച്ചിരുന്നത്. ലളിതമായ ആഭരണങ്ങളോടൊപ്പം കുറച്ച് വളകളും സ്റ്റൈലിഷ് കമ്മലുകളും മാത്രമാണ് അവർ അണിഞ്ഞിരുന്നത്. സെന്റർ പാർട്ടീഷൻ ചെയ്ത് അയഞ്ഞ ചുരുളുകളായി മുടിയും അഴിച്ചിട്ടിരുന്നു.
നവദമ്പതികളെ വിജയ് ആശംസിക്കുന്ന ചിത്രങ്ങളും ഓൺലൈനിൽ വൈറലായിട്ടുണ്ട്. നീല നിറത്തിലുള്ള ഫ്ലോറൽ പാറ്റേണുകളോട് കൂടിയ വസ്ത്രമാണ് ചടങ്ങിൽ വിജയ് ധരിച്ചിരുന്നത്. കമൽഹാസനും വിവാഹ സത്കാരത്തിനെത്തി നവദമ്പതികളെ നേരിട്ട് കണ്ട് ആശംസകൾ നേർന്നു. ചടങ്ങിന് ഇണങ്ങുന്ന പരമ്പരാഗത വസ്ത്രത്തിലാണ് കമൽഹാസൻ എത്തിയത്. ഇവരുടെ ചിത്രങ്ങളും സോഷ്യൽ മീഡിയയിൽ പ്രചരിക്കുന്നുണ്ട്.



