എന്തൊരു മാറ്റം; 54-ാം വയസിൽ മെലിഞ്ഞ് അതീവ സുന്ദരിയായി ഖുശ്ബു, മോശം കമന്റിന് മാസ് മറുപടി
പതിറ്റാണ്ടുകളായി സിനിമാ മേഖലയില്‍ സജീവമായി നില്‍ക്കുന്ന താരമാണ് ഖുശ്ബു. നിലവില്‍ രാഷ്ട്രീയത്തിലും മുന്നിലുള്ള താരം സോഷ്യല്‍ മീഡിയയില്‍ സജീവമാണ്. അടുത്തിടെയായി ശരീരം ഭാരം കുറയ്ക്കുകയാണ് ഖുശ്ബു. അക്കാര്യം മുന്‍പേ തന്നെ നടി അറിയിച്ചിട്ടുമുണ്ട്. ഇപ്പോഴിതാ 20 കിലോ ഗ്രാം ശരീര ഭാരം കുറച്ച ഖുശ്ബുവിന്റെ ഫോട്ടോകളാണ് സോഷ്യല്‍ മീഡിയയില്‍ തരംഗമായി മാറിയിരിക്കുന്നത്.
തന്റെ 54-ാമത്തെ വയസിലാണ് ഖുശ്ബു സുന്ദര്‍ 20 കിലോ ഭാരം കുറച്ചിരിക്കുന്നത്. കൊവിഡ് വേളയില്‍ ആയിരുന്നു വര്‍ക്കൗട്ടുമായി ഖുശ്ബുവിന്റെ യാത്ര തുടരുന്നത്. അന്ന് 93 കിലോ ആയിരുന്നു നടിയുടെ ഭാ?രം. ഒന്‍പത് മാസം കൊണ്ടായിരുന്നു ഇത്രയും ശരീരഭാരം താന്‍ കുറച്ചതെന്ന് ഖുശ്ബു ടെല്‍ മൈ സ്റ്റോറി എന്ന യുട്യൂബ് ചാനലിന് നല്‍കിയ അഭിമുഖത്തില്‍ പറഞ്ഞു. അമിത ഭാരം കാരണം നല്ല ബുദ്ധിമുട്ട് ഉണ്ടായിരുന്നുവെന്നും ഇപ്പോള്‍ സന്ധിവേദന ശമിച്ചുവെന്നും നടി പറയുന്നുണ്ട്. ഖുശ്ബുവിനെ പ്രശംസിച്ച് നിരവധി പേരാണ് പോസ്റ്റുകള്‍ക്ക് താഴേ കമന്റ് ചെയ്യുന്നത്. ഇതിലൊരു വിമര്‍ശന കമന്റിന് ഖുശ്ബു നല്‍കിയ കമന്റും ഏറെ ശ്രദ്ധനേടുകയാണ്.
ടൈപ് 2 പ്രമേഹമുള്ളവരുടെ രക്തത്തിലെ പഞ്ചസാരയുടെ അളവ് നിയന്ത്രിക്കാനുള്ള മൗന്‍ജാരോ ഇന്‍ജക്ഷന്‍ ഖുഷ്ബു എടുത്തെന്നാണ് ഇയാള്‍ കമന്റ് ചെയ്തിരിക്കുന്നത്. ‘ഇത് മൗന്‍ജാരോ ഇന്‍ജക്ഷന്റെ മാജിക്കാണ്. ഇക്കാര്യം നിങ്ങളുടെ ഫോളോവേഴ്‌സും അറിയട്ടെ. അപ്പോള്‍ അവര്‍ക്കും ഇന്‍ജക്ഷന്‍ എടുക്കാമല്ലോ’, എന്നായിരുന്നു എക്‌സ് പ്ലാറ്റ് ഫോമില്‍ വന്ന കമന്റ്. ഇത് ശ്രദ്ധയില്‍പ്പെട്ട ഖുശ്ബു കമന്റുമായി രംഗത്ത് എത്തി.
‘നിങ്ങളെ പോലുള്ളവര്‍ എന്തൊരു തലവേദനയാണ്. നിങ്ങളൊന്നും ഒരിക്കലും സ്വന്തം മുഖം കാണിക്കാറില്ല. അതെന്താണെന്ന് നിങ്ങള്‍ക്ക് തന്നെ അറിയാം. ഉള്ളിന്റെ ഉള്ളില്‍ നിങ്ങള്‍ എത്ര വൃത്തിക്കെട്ടവരാണെന്ന്. നിങ്ങളുടെ മതാപിതാക്കളോട് സഹതാപം മാത്രം’, എന്നാണ് ഖുശ്ബു നല്‍കിയ മറുപടി.
