‘ഖലീഫ’യിൽ ഇന്ദ്രൻസിന്റെ പുതിയ ക്യാരക്ടർ ലുക്ക് പുറത്ത്; ഓഗസ്റ്റ് 20ന് തിയേറ്ററുകളിൽ
പൃഥ്വിരാജ് നായകനാകുന്ന ബിഗ് ബജറ്റ് ചിത്രം **‘ഖലീഫ’**യിലെ പുതിയ ക്യാരക്ടർ ലുക്ക് അണിയറപ്രവർത്തകർ പുറത്തുവിട്ടു. ചിത്രത്തിൽ ‘ഹംസ’ എന്ന കഥാപാത്രമായി എത്തുന്ന ഇന്ദ്രൻസിന്റെ പോസ്റ്ററാണ് പുറത്തിറങ്ങിയത്.
വൈശാഖ് സംവിധാനം ചെയ്യുന്ന ചിത്രം ഈ ഓണത്തിന് ഓഗസ്റ്റ് 20ന് ആഗോളതലത്തിൽ തിയേറ്ററുകളിലെത്തും. ‘പോക്കിരി രാജ’യ്ക്ക് ശേഷം വൈശാഖും പൃഥ്വിരാജും വീണ്ടും ഒന്നിക്കുന്ന ചിത്രം എന്ന പ്രത്യേകതയും ‘ഖലീഫ’യ്ക്കുണ്ട്.
‘ആദം ജോൺ’, ‘ലണ്ടൻ ബ്രിഡ്ജ്’, ‘മാസ്റ്റേഴ്സ്’, ‘കടുവ’ തുടങ്ങിയ ചിത്രങ്ങൾക്ക് ശേഷം ജിനു വി. എബ്രഹാമും പൃഥ്വിരാജും ഒന്നിക്കുന്ന ചിത്രമാണിത്. ‘മാമ്പറയ്ക്കൽ ആമിർ അലി’ എന്ന നായക കഥാപാത്രത്തെയാണ് പൃഥ്വിരാജ് അവതരിപ്പിക്കുന്നത്. മാളവിക ശർമ്മയാണ് നായിക.
മലയാളത്തിന്റെ സൂപ്പർതാരം മോഹൻലാലും ചിത്രത്തിൽ അതിഥി വേഷത്തിലെത്തുന്നുണ്ട്. ‘മാമ്പറയ്ക്കൽ അഹമ്മദ് അലി’ എന്ന കഥാപാത്രമായാണ് മോഹൻലാൽ എത്തുന്നത്. ‘ലൂസിഫർ’, ‘ബ്രോ ഡാഡി’, ‘എമ്പുരാൻ’ തുടങ്ങിയ ചിത്രങ്ങൾക്ക് ശേഷം പൃഥ്വിരാജ്–മോഹൻലാൽ കൂട്ടുകെട്ട് വീണ്ടും ഒന്നിക്കുന്നതിനാൽ വലിയ പ്രതീക്ഷയിലാണ് ആരാധകർ.
സംഗീതത്തിനും ചിത്രത്തിൽ പ്രധാന്യമുണ്ട്. പൃഥ്വിരാജ്–ജേക്സ് ബിജോയ് കൂട്ടുകെട്ടിൽ ഒരുക്കിയ ചിത്രത്തിലെ ആദ്യ ഗാനം ‘അസലായവളേ’ ഇതിനോടകം മൂന്ന് ദശലക്ഷത്തിലധികം കാഴ്ചകൾ നേടി യൂട്യൂബിൽ ട്രെൻഡിംഗിലാണ്.
ജിനു ഇന്നോവേഷൻസിന്റെ ബാനറിൽ ജിനു വി. എബ്രഹാമാണ് ചിത്രം നിർമിക്കുന്നത്. സൂരജ് കുമാർ, ശ്രീലാൽ സൂരപാണി, സിജോ സെബാസ്റ്റ്യൻ എന്നിവർ സഹനിർമാതാക്കളാണ്.
ഛായാഗ്രഹണം ജോമോൻ ടി. ജോൺ, സംഗീതം ജേക്സ് ബിജോയ്, എഡിറ്റിംഗ് ചമൻ ചാക്കോ, പ്രൊഡക്ഷൻ ഡിസൈൻ മോഹൻദാസ് എന്നിവരാണ് നിർവഹിക്കുന്നത്. യാനിക്ക് ബെൻ, ഫീനിക്സ് പ്രഭു, ചേതൻ ഡിസൂസ എന്നിവർ ആക്ഷൻ കൊറിയോഗ്രഫി നിർവഹിക്കുന്നു.
