‘മഞ്ഞുമ്മൽ ബോയ്സ്’ എന്ന ഇൻഡസ്ട്രി ഹിറ്റിന് ശേഷം ചിദംബരം സംവിധാനം ചെയ്ത ‘ബാലൻ – ദി ബോയ്’ എന്ന ചിത്രത്തെയും അതിന്റെ അണിയറപ്രവർത്തകരെയും വാനോളം പ്രശംസിച്ച് തെന്നിന്ത്യൻ സൂപ്പർ നായിക ജ്യോതിക. ഇൻസ്റ്റാഗ്രാമിൽ പങ്കുവെച്ച വൈകാരികമായ കുറിപ്പിലൂടെയാണ് മലയാളത്തിൽ നിന്ന് വീണ്ടുമൊരു ദൃശ്യവിസ്മയം എത്തിയിരിക്കുകയാണെന്ന് ജ്യോതിക വ്യക്തമാക്കിയത്. ഭർത്താവും നടനുമായ സൂര്യക്കൊപ്പം സംവിധായകൻ ചിദംബരത്തെ നേരിൽ കണ്ട ചിത്രവും ജ്യോതിക പോസ്റ്റിനൊപ്പം പങ്കുവെച്ചിട്ടുണ്ട്. ‘ആവേശം’ സംവിധായകൻ ജിത്തു മാധവന്റെ മൂർച്ചയേറിയ തിരക്കഥയെ ഒരു ‘മാസ്റ്റർപീസ്’ എന്നാണ് ജ്യോതിക വിശേഷിപ്പിച്ചത്.
ചിത്രത്തിലെ അഭിനേതാക്കളുടെ പ്രകടനത്തെ ജ്യോതിക പ്രത്യേകം എടുത്തുപറഞ്ഞു. സ്വന്തം താരമൂല്യം പൂർണ്ണമായും മാറ്റിവെച്ച് ടൊവിനോ തോമസ് തന്റെ കരിയറിലെ ഏറ്റവും മികച്ച പ്രകടനങ്ങളിലൊന്നാണ് ബാലനിൽ കാഴ്ചവെച്ചിരിക്കുന്നതെന്ന് അവർ കുറിച്ചു. സ്ത്രീത്വത്തിന്റെ ശക്തമായ പ്രതിരൂപമായി ഫർസാന വെള്ളിത്തിരയിൽ വിസ്മയിപ്പിച്ചപ്പോൾ, ആദിശേഷൻ എന്ന ബാലതാരത്തിന്റെ കണ്ണുകളിലെ ആഴവും നിഷ്കളങ്കതയും പ്രേക്ഷകരുടെ ഹൃദയത്തിലേക്ക് തുളഞ്ഞുകയറുന്നതാണെന്ന് ജ്യോതിക പറഞ്ഞു. ധൈര്യശാലിയായ ‘ഡോളി ജൂൺ’ എന്ന കഥാപാത്രത്തിന്റെ പുതുമയും ചിത്രത്തിന് കരുത്തായി. ഇതിനൊപ്പം സുഷിൻ ശ്യാമിന്റെ ഉദ്വേഗഭരിതമായ സംഗീതവും, ഷൈജു ഖാലിദിന്റെ കവിതാത്മകമായ ക്യാമറ ഫ്രെയിമുകളും ചിത്രത്തെ ഒരു തികഞ്ഞ ദൃശ്യവിരുന്നാക്കി മാറ്റിയെന്നും അവർ കൂട്ടിച്ചേർത്തു.
ഈ വലിയ ദുഷ്ട ലോകത്തിൽ നഷ്ടപ്പെടുന്ന നിഷ്കളങ്കതയുടെയും മാതൃത്വത്തിന്റെയും കഥ പറയുന്ന തികച്ചും ബുദ്ധിപരമായ ഒരു സൃഷ്ടിയാണ് ‘ബാലൻ’ എന്നും തിയേറ്ററുകളിൽ ഇത് ആരും നഷ്ടപ്പെടുത്തരുതെന്നും ജ്യോതിക ഓർമ്മിപ്പിച്ചു. അഞ്ച് വയസ്സുകാരനായ മകന്റെയും അമ്മയുടെയും സുരക്ഷിതത്വത്തിന് വേണ്ടിയുള്ള അന്വേഷണമാണ് ഈ മിസ്റ്ററി ചിത്രം പങ്കുവെക്കുന്നത്. മുഹമ്മദ് സിനാൻ, ജീൻ പോൾ ലാൽ, ഗിരീഷ് എ.ഡി, ബീന ആന്റണി എന്നിവരും പ്രധാന വേഷങ്ങളിലെത്തുന്ന ഈ ചിത്രം കെ.വി.എൻ പ്രൊഡക്ഷൻസും തെസ്പിയൻ ഫിലിംസും ചേർന്നാണ് നിർമ്മിച്ചിരിക്കുന്നത്. ജ്യോതികയുടെ ഈ കുറിപ്പ് പുറത്തുവന്നതോടെ വലിയ ആവേശത്തിലാണ് സിനിമാ പ്രേമികൾ.
