മമ്മൂട്ടി: മറ്റുള്ളവരുടെ അഭിപ്രായം കേട്ട് അല്ല, സ്വന്തം ഇഷ്ടപ്രകാരം സിനിമ കാണണം
ദുബായ്: മറ്റുള്ളവരുടെ അഭിപ്രായങ്ങൾക്കപ്പുറം സ്വന്തം ഇഷ്ടപ്രകാരം സിനിമകൾ കാണാൻ പ്രേക്ഷകർ തയ്യാറാകണമെന്ന് മെഗാസ്റ്റാർ മമ്മൂട്ടി. സൈബർ ലോകത്ത് സ്വകാര്യത നഷ്ടപ്പെടുന്നതിനെക്കുറിച്ച് സംസാരിക്കുന്ന തന്റെ പുതിയ ചിത്രം ‘പേട്രിയറ്റ്’ന്റെ ഗൾഫ് റിലീസുമായി ബന്ധപ്പെട്ട് ദുബായിൽ നടന്ന പരിപാടിയിലാണ് അദ്ദേഹം പ്രതികരിച്ചത്.
ഒരു സിനിമ പുറത്തിറങ്ങുമ്പോൾ അതിനെക്കുറിച്ച് വിവിധ അഭിപ്രായങ്ങൾ ഉണ്ടാകുന്നത് സ്വാഭാവികമാണെന്നും, എന്നാൽ അവ കേട്ടു മാത്രം സിനിമ കാണരുതെന്നും മമ്മൂട്ടി പറഞ്ഞു. ഓരോ പ്രേക്ഷകനും സിനിമയെ വ്യത്യസ്തമായി കാണുമെന്നും, അതിനാൽ സ്വന്തം അനുഭവത്തിനാണ് പ്രധാന്യം നൽകേണ്ടതെന്നും അദ്ദേഹം വ്യക്തമാക്കി. എല്ലാവർക്കും ആസ്വദിക്കാൻ കഴിയുന്ന രീതിയിലാണ് ‘പേട്രിയറ്റ്’ ഒരുക്കിയിരിക്കുന്നതെന്നും അദ്ദേഹം കൂട്ടിച്ചേർത്തു.
സ്വകാര്യതയില്ലാത്ത കാലഘട്ടത്തിലാണ് നാം ജീവിക്കുന്നതെന്നും, ഈ കാലികപ്രസക്തമായ വിഷയമാണ് ചിത്രത്തിന്റെ പ്രമേയമെന്നും മമ്മൂട്ടി ഓർമ്മിപ്പിച്ചു. സിനിമ കണ്ടശേഷം രൂപപ്പെടുന്ന പ്രേക്ഷകരുടെ വ്യക്തിഗത അഭിപ്രായത്തിനാണ് ഏറ്റവും കൂടുതൽ പ്രാധാന്യമെന്നും അദ്ദേഹം പറഞ്ഞു.
പരിപാടിയിൽ മുപ്പത് വർഷത്തെ സിനിമാജീവിതത്തെക്കുറിച്ച് സംസാരിക്കുമ്പോൾ, തനിക്ക് മുപ്പത് വയസ്സായി എന്ന് മമ്മൂട്ടി തമാശയായി പറഞ്ഞത് സദസിൽ ചിരിയും കൈയടിയും നേടി. സംവിധായകൻ മഹേഷ് നാരായണൻ, നടി ഷെറിൻ ഷിഹാബ് തുടങ്ങിയവർ ചടങ്ങിൽ പങ്കെടുത്തു.
