ജയസൂര്യ നായകനായി മിഥുൻ മാനുവൽ തോമസ് സംവിധാനം ചെയ്യുന്ന ആട് 3 : വൺ ലാസ്റ്റ് റൈഡ് - പാർട് വണ്ണിലെ ആദ്യ ഗാനം പുറത്ത്. ‘സുൽത്താൻ’ എന്ന ഗാനം തെന്നിന്ത്യൻ താരം വേദികയുടെ തകർപ്പൻ നൃത്തത്തോടെയാണ് ഒരുക്കിയിരിക്കുന്നത്. പാട്ടിൽ സുൽത്താനായി നടൻ വിനായകൻ എത്തുന്നു. രാജഭരണകാലം ചിത്രീകരിച്ചിരിക്കുന്ന ഗാനത്തിൽ ജയസൂര്യയും പ്രത്യക്ഷപ്പെടുന്നുണ്ട്. ഷാൻ റഹ്മാൻ ആണ് ഈ ഗാനത്തിന് ഈണം നൽകിയിരിക്കുന്നത്.
മനു മഞ്ജിത്തിന്റേതാണ് വരികൾ. അനില രാജീവാണ് ഗാനം ആലപിച്ചത്. ആട് 3യിൽ ഒരു പ്രമുഖ ചലച്ചിത്ര താരംഐറ്റം ഡാൻസ് ചെയ്യുന്നുണ്ടെന്ന തരത്തിൽ പല പേരുകളും സമൂഹമാദ്ധ്യമത്തിൽ ഉയർന്നിരുന്നു. തുടർന്ന് ഈ ഗാനത്തിനായി ആരാധകർ കാത്തിരിക്കുകയായിരുന്നു.
മാർച്ച് 19 നാണ് ആട് 3 റിലീസ് ചെയ്യുന്നത്. ഫ്രൈഡേ ഫിലിംസിന്റെ ബാനറിൽ വിജയ് ബാബു നിർമ്മിക്കുന്ന ചിത്രത്തിൽ ജയസൂര്യയെ കൂടാതെ ഇന്ദ്രൻസ്, വിനായകൻ, സൈജുകുറുപ്പ്, സണ്ണി വയ്ൻ, ബിജുക്കുട്ടൻ, ധർമ്മജൻ ബോൾഗാട്ടി, വിജയ് ബാബു തുടങ്ങിയവരും അഭിനയിക്കുന്നുണ്ട്. പൊട്ടിച്ചിരിപ്പിക്കുന്ന രംഗങ്ങളും ഫാന്റസി ഘടകങ്ങളും കോർത്തിണക്കുന്നതാണ് ചിത്രം.
ജയസൂര്യയുടെ കരിയറിലെ 107-ാമത് സിനിമ കൂടിയാണ് ആട് 3.ആട് ഫ്രാഞ്ചൈസിയിലെ ആദ്യ ചിത്രം ആട് ഒരു ഭീകരജീവിയാണ് തിയേറ്ററിൽ പരാജയമായിരുന്നെങ്കിലും ടിവിയിൽ സംപ്രേക്ഷണം ചെയ്തതോടെ പ്രേക്ഷകർ ഏറ്റെടുത്തു. പിന്നാലെ രണ്ടാംഭാഗമായ ആട് 2 എത്തി വിജയം കൊയ്തിരുന്നു. 2024 മാർച്ചിൽ ആയിരുന്നു മൂന്നാം ഭാഗത്തെ കുറിച്ചുള്ള ഔദ്യോഗിക പ്രഖ്യാപനം വന്നത്.
