ട്രോളുകൾക്ക് കിടിലൻ മറുപടി; ‘അവിടെ മലയാളം, ഇവിടെ തെലുങ്ക് സിനിമ’; ചിരിച്ചുകൊണ്ട് പ്രതികരിച്ച് ദുൽഖർ സൽമാൻ!
കൊച്ചി: ഭാഷ മാറി സിനിമകൾ ചെയ്യുന്നുവെന്ന പേരിൽ സമൂഹമാധ്യമങ്ങളിൽ ഉയരുന്ന ട്രോളുകളോട് രസകരമായ മറുപടിയുമായി നടൻ ദുൽഖർ സൽമാൻ. താൻ സിനിമാ നടനാകുന്നതിൽ പിതാവിന് വലിയ ഭയമുണ്ടായിരുന്നുവെന്നും സിനിമയിൽ എത്തി ഇത്രയും വർഷം പ്രേക്ഷകരുടെ സ്നേഹം നേടാൻ കഴിയുമെന്ന് പ്രതീക്ഷിച്ചിരുന്നില്ലെന്നും താരം വെളിപ്പെടുത്തി.
തന്റെ പുതിയ തെലുങ്ക് ചിത്രം ‘എ.ഒ.ടി’യുടെ കൊച്ചിയിൽ നടന്ന പ്രീ-റിലീസ് പരിപാടിയിൽ സംസാരിക്കുകയായിരുന്നു അദ്ദേഹം. താൻ സിനിമയിൽ അഭിനയിക്കുമോ, വിജയിക്കുമോ എന്ന ആശങ്ക പിതാവിനുണ്ടായിരുന്നുവെന്നും ദുൽഖർ പറഞ്ഞു. സിനിമയിൽ എത്തുക എന്നതായിരുന്നു തന്റെ ഏറ്റവും വലിയ ആഗ്രഹമെന്നും എന്നാൽ ഇത്രത്തോളം മുന്നോട്ടുപോകുമെന്ന് ഒരിക്കലും കരുതിയിരുന്നില്ലെന്നും അദ്ദേഹം കൂട്ടിച്ചേർത്തു.
ഭാഷകൾ മാറി സിനിമകൾ ചെയ്യുന്നതിനെക്കുറിച്ചുള്ള ട്രോളുകളോടും താരം പ്രതികരിച്ചു. ‘അവിടെപ്പോയി മലയാളം പടം ചെയ്യും, ഇവിടെ വന്ന് തെലുങ്ക് പടം ചെയ്യും’ എന്ന തരത്തിലുള്ള പരിഹാസങ്ങൾ ശ്രദ്ധയിൽപ്പെട്ടിട്ടുണ്ടെന്ന് ദുൽഖർ പറഞ്ഞു. തന്റെ പുതിയ ചിത്രം ‘എ.ഒ.ടി’യും ‘ഐ ആം ഗെയിം’ പോലെയുള്ള സിനിമയല്ലെന്നും തികച്ചും വ്യത്യസ്തമായ ജോണറിലുള്ള ചിത്രമാണെന്നും അദ്ദേഹം
വ്യക്തമാക്കി. ഒരു പ്രത്യേക ഭാഷയുടെയോ പ്രദേശത്തിന്റെയോ കഥയല്ല ചിത്രം പറയുന്നതെന്നും ഇന്ത്യയിലെ ഏത് ഗ്രാമത്തിലും നാട്ടിലും സംഭവിക്കാവുന്ന കഥയാണെന്നും താരം പറഞ്ഞു. സിനിമയിൽ നെഗറ്റീവുകൾ ഏറെയുണ്ടെങ്കിലും സ്വന്തം കഴിവ് തെളിയിക്കാൻ സമൂഹമാധ്യമങ്ങൾ വലിയ അവസരമാണ് നൽകുന്നതെന്നും ദുൽഖർ അഭിപ്രായപ്പെട്ടു.
തന്റെ ചിത്രമായ ‘എ.ഒ.ടി’ക്കൊപ്പം മമ്മൂട്ടിയുടെ പുതിയ ചിത്രമായ ‘ഓം’ കൂടി പ്രേക്ഷകർ കാണണമെന്നും ദുൽഖർ അഭ്യർഥിച്ചു. രണ്ടും വ്യത്യസ്ത ഭാഷകളിലും ജോണറുകളിലുമുള്ള സിനിമകളാണെന്നും നല്ല സിനിമകൾ ഏത് ഭാഷയിലാണെങ്കിലും പ്രേക്ഷകർ സ്വീകരിക്കണമെന്നും അദ്ദേഹം പറഞ്ഞു. പ്രത്യേകിച്ച് മലയാളികൾ മറ്റ് ഭാഷകളിലെ മികച്ച സിനിമകൾ തേടിപ്പോയി കാണുന്നവരാണെന്നും ഇപ്പോൾ എല്ലാ ഭാഷകളിലെയും പ്രേക്ഷകർ പരസ്പരം സിനിമകൾ ആസ്വദിക്കുന്ന സാഹചര്യമുണ്ടെന്നും താരം ചൂണ്ടിക്കാട്ടി. ഭാഷ ഇനി നല്ല സിനിമകൾക്ക് തടസ്സമല്ലെന്ന ദുൽഖറിന്റെ വാക്കുകൾ സിനിമാപ്രേമികൾക്കിടയിലും ശ്രദ്ധ നേടുകയാണ്.
