പാകിസ്ഥാനും മാലിദ്വീപും കൈകോർത്തു! 20 ധാരണാപത്രങ്ങളിൽ ഒപ്പുവച്ചു; ബന്ധം ശക്തമാക്കാൻ ഷെഹ്ബാസ് ഷെരീഫ്
ഇസ്‌ലാമാബാദ്: വിവിധ മേഖലകളിൽ ഉഭയകക്ഷി സഹകരണം ശക്തിപ്പെടുത്തുന്നതിനായി പാകിസ്ഥാനും മാലദ്വീപും 20 ധാരണാപത്രങ്ങളിൽ ഒപ്പുവച്ചു. ഇരു രാജ്യങ്ങളും തമ്മിലുള്ള ബന്ധം വരുംകാലങ്ങളിലും കൂടുതൽ ശക്തിപ്പെടുത്തുമെന്ന് പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് വ്യക്തമാക്കി. മാലദ്വീപ് പ്രസിഡന്റ് ഡോ. മുഹമ്മദ് മുയിസുവിന്റെ പാകിസ്ഥാൻ സന്ദർശനത്തിന്റെ ഭാഗമായി ബുധനാഴ്ചയാണ് ധാരണാപത്രങ്ങൾ കൈമാറിയത്.
മൂന്ന് ദിവസത്തെ ഔദ്യോഗിക സന്ദർശനത്തിനായി ഒക്ടോബർ 20-ന് പാകിസ്ഥാനിലെത്തിയ മുയിസുവിന് ഇസ്‌ലാമാബാദിലെ പ്രധാനമന്ത്രിയുടെ ഔദ്യോഗിക വസതിയിൽ ഔപചാരിക സ്വീകരണം നൽകി. 11 വർഷത്തിനിടെ ഒരു മാലദ്വീപ് പ്രസിഡന്റ് പാകിസ്ഥാനിലേക്ക് നടത്തുന്ന ആദ്യ സന്ദർശനമാണിത്. ഇരു രാജ്യങ്ങളും തമ്മിൽ നയതന്ത്രബന്ധം സ്ഥാപിച്ചതിന്റെ 60-ാം വാർഷികത്തോടനുബന്ധിച്ചാണ് സന്ദർശനം നടക്കുന്നത്.
ധാരണാപത്രങ്ങൾ കൈമാറിയശേഷം നടത്തിയ സംയുക്ത വാർത്താസമ്മേളനത്തിൽ, പാകിസ്ഥാനും മാലദ്വീപും തമ്മിലുള്ള ബന്ധം എക്കാലവും ശക്തിപ്പെട്ടുകൊണ്ടിരിക്കുമെന്ന് ഷെഹ്ബാസ് ഷെരീഫ് പറഞ്ഞു. ഇരു രാജ്യങ്ങളും തമ്മിലുള്ള സൗഹൃദബന്ധം കൂടുതൽ മേഖലകളിലേക്ക് വ്യാപിപ്പിക്കേണ്ടതിന്റെ പ്രാധാന്യവും അദ്ദേഹം ചൂണ്ടിക്കാട്ടി.
പ്രതിരോധം, സമുദ്രസുരക്ഷ, വിവരസാങ്കേതികവിദ്യ, സൈബർ സുരക്ഷ, നിർമിതബുദ്ധി, വ്യാപാരം, വിനോദസഞ്ചാരം, ആരോഗ്യം, വിദ്യാഭ്യാസം, കൃഷി, മത്സ്യബന്ധനം, പരിസ്ഥിതി സംരക്ഷണം തുടങ്ങിയ മേഖലകളിലാണ് പ്രധാനമായും സഹകരണം വിപുലീകരിക്കുന്നത്. ലഹരിമരുന്ന് കടത്ത് തടയൽ, സാമൂഹിക സുരക്ഷ, യുവജനവികസനം, കായികം, വ്യോമഗതാഗതം, പോലീസ് പരിശീലനം, സിവിൽ സർവീസ് തുടങ്ങിയ മേഖലകളും ധാരണാപത്രങ്ങളുടെ പരിധിയിൽ ഉൾപ്പെടുന്നു.
ആരോഗ്യ, വിദ്യാഭ്യാസ മേഖലകളിലെ സഹകരണത്തിനും ഇരു രാജ്യങ്ങളും പ്രത്യേക പ്രാധാന്യം നൽകുന്നുണ്ട്. നിരവധി മാലദ്വീപ് വിദ്യാർഥികൾ പാകിസ്ഥാനിലെ സർവകലാശാലകളിലും കോളേജുകളിലും പഠിക്കുന്നുണ്ടെന്നും, പ്രത്യേകിച്ച് ആരോഗ്യവിദ്യാഭ്യാസ രംഗത്ത് മാലദ്വീപ് വിദ്യാർഥികളുടെ സാന്നിധ്യം ശ്രദ്ധേയമാണെന്നും ഷെഹ്ബാസ് ഷെരീഫ് പറഞ്ഞു. ഏകദേശം 250 പാകിസ്ഥാൻ ഡോക്ടർമാരും മറ്റ് ആരോഗ്യപ്രവർത്തകരും മാലദ്വീപിൽ സേവനമനുഷ്ഠിക്കുന്നുണ്ടെന്നും അദ്ദേഹം വ്യക്തമാക്കി. മാലദ്വീപിന്റെ ആവശ്യങ്ങൾക്കനുസരിച്ച് ഭാവിയിൽ ഈ മേഖലയിൽ കൂടുതൽ സഹകരണം നൽകാൻ പാകിസ്ഥാൻ തയ്യാറാണെന്നും അദ്ദേഹം അറിയിച്ചു.
ഇരു രാജ്യങ്ങളും തമ്മിലുള്ള വ്യാപാരവും നിക്ഷേപവും വർധിപ്പിക്കുന്നതിനായി പാകിസ്ഥാൻ–മാലദ്വീപ് ബിസിനസ് ഫോറവും സന്ദർശനത്തിന്റെ ഭാഗമായി സംഘടിപ്പിക്കുന്നുണ്ട്. ഇരു രാജ്യങ്ങളിലെയും വ്യവസായികൾക്കും സംരംഭകർക്കും പരസ്പരം സഹകരിക്കാനും പുതിയ നിക്ഷേപാവസരങ്ങൾ കണ്ടെത്താനും ഫോറം സഹായിക്കുമെന്നാണ് പ്രതീക്ഷിക്കുന്നത്.
സന്ദർശനത്തിന്റെ ഭാഗമായി മാലദ്വീപ് പ്രസിഡന്റ് മുഹമ്മദ് മുയിസുവിന് ഇസ്‌ലാമാബാദിലെ ഇന്റർനാഷണൽ ഇസ്‌ലാമിക് യൂണിവേഴ്‌സിറ്റി രാഷ്ട്രീയശാസ്ത്രത്തിൽ ഓണററി ഡോക്ടറേറ്റും നൽകി.
നയതന്ത്രബന്ധത്തിന്റെ ആറു പതിറ്റാണ്ട് പിന്നിടുന്ന സാഹചര്യത്തിൽ, പുതിയ ധാരണാപത്രങ്ങൾ ഇരു രാജ്യങ്ങളും തമ്മിലുള്ള സാമ്പത്തിക, സാങ്കേതിക, വിദ്യാഭ്യാസ, പ്രതിരോധ സഹകരണം കൂടുതൽ വിപുലീകരിക്കുമെന്നാണ് പ്രതീക്ഷിക്കുന്നത്.
