വീണ്ടും അമ്മയായതിന്റെ സന്തോഷം പങ്കുവച്ച് നടി ഷംന കാസിം. ഇന്ന് പുലർച്ചെയാണ് ഷംന ഒരു പെൺകുഞ്ഞിന് ജന്മം നൽകിയത്. ‘അല്ലാഹുവിന്റെ വിലപ്പെട്ട സമ്മാനം’ എന്ന് സോഷ്യൽ മീഡിയയിൽ കുറിച്ചുകൊണ്ട് ഭർത്താവ് ഷാനിദ് ആസിഫ് അലിയാണ് സന്തോഷവാർത്ത പങ്കുവച്ചത്. അമ്മയും കുഞ്ഞും സുഖമായിരിക്കുന്നുവെന്ന് ഷാനിദ് അറിയിച്ചു. പോസ്റ്റ് സോഷ്യൽ മീഡിയയിൽ വൈറലായതോടെ ഒട്ടേറെ പേരാണ് ആശംസകൾ അറിയിച്ച് രംഗത്തെത്തിയത്.
അല്ലാഹുവിന്റെ അനുഗ്രഹത്താൽ ഞങ്ങളുടെ കുടുംബത്തിൽ ഇന്ന് പുലർച്ചെ 4:25ന് ഒരു പെൺകുഞ്ഞ് ജനിച്ചു. അവൾ അല്ലാഹുവിന്റെ വിലയേറിയ സമ്മാനവും ഞങ്ങളുടെ ഹംദു മോന്റെ സ്നേഹ നിധിയായ സഹോദരിയുമാണ്. ഞങ്ങളുടെ കുടുംബത്തിന് ലഭിച്ച ഒരു വലിയ അനുഗ്രഹമാണിത്. സുഖ പ്രസവമാണ്. അല്ലാഹു നമ്മുടെ കുഞ്ഞിനെയും കുടുംബത്തെ അനുഗ്രഹിക്കട്ടെ. ഡോ. സഫ ഫാത്തിമയ്ക്കും ലേബർ റൂമിലും ഞങ്ങൾക്കൊപ്പം നിന്ന എല്ലാ നഴ്സുമാർക്കും ആസ്റ്റർ ഹോസ്പിറ്റലിലെ ടീമിനും നന്ദി.
പ്രാർത്ഥനയിൽ ഞങ്ങളെയും ചേർത്തുനിർത്തിയ എല്ലാ പ്രിയപ്പെട്ടവർക്കും പ്രത്യേകം നന്ദി’-ഷാനിദ് ആസിഫ് അലി സോഷ്യൽ മീഡിയയിൽ കുറിച്ചുകഴിഞ്ഞ ദിവസം തന്റെ ഒമ്പത് മാസത്തെ ഗർഭകാലത്തെക്കുറിച്ച് ഷംന മനോഹരമായ ഒരു കുറിപ്പ് സോഷ്യൽ മീഡിയയിൽ പങ്കുവച്ചിരുന്നു. ഒൻപത് മാസത്തെ മനോഹരമായ ഒരു യാത്ര. എന്റെ രണ്ട് ഉമ്മമാർ എന്നെ സ്നേഹത്തോടെയും കരുതലോടെയും ഒരുക്കിയപ്പോൾ ഉണ്ടായ ആ ശുദ്ധമായ സന്തോഷത്തിന്റെ നിമിഷം. അത് വാക്കുകൾ കൊണ്ട് വിവരിക്കാൻ കഴിയില്ല.
പ്രസവദിനം അടുത്തുവരികയാണ്. ദയവായി എന്നെയും എന്റെ കുഞ്ഞിനെയും നിങ്ങളുടെ പ്രാർത്ഥനകളിൽ ഓർക്കണമെന്നാണ് ഷംന കുറിച്ചത്.2022 ൽ ആണ് ദുബായ് ജെ.ബി.എസ് ഗ്രൂപ്പ് കമ്പനിയുടെ സ്ഥാപകനും സി.ഇ.ഒ.യുമായ ഷാനിദ് ആസിഫ് അലിയുമായുള്ള ഷംനയുടെ വിവാഹം. ഷംന ഷാനിദ് ദമ്പതികൾക്ക് ഹംദാൻ എന്നൊരു മകനുണ്ട്. കുറച്ചുദിവസങ്ങൾക്ക് മുൻപാണ് താൻ രണ്ടാമതും അമ്മയാകാൻ പോകുന്നുവെന്ന സന്തോഷവാർത്ത ഷംന സമൂഹമാദ്ധ്യമത്തിൽ പങ്കുവച്ചത്.
