തെന്നിന്ത്യൻ താരം അനുഷ്ക ഷെട്ടിയുടെ വിവാഹനിശ്ചയം കഴിഞ്ഞെന്ന രീതിയിൽ പ്രചരിക്കുന്ന ചിത്രം വ്യാജം. 2016-ൽ ഹൈദരാബാദിൽ നടന്ന ഫാഷൻ ഷോയിൽ നിന്നുള്ള ചിത്രമാണിത്. അനുഷ്ക ഷെട്ടിയുടെ വിവാഹനിശ്ചയം രഹസ്യമായി കഴിഞ്ഞു എന്ന തരത്തിലുള്ള വാർത്തകൾ സോഷ്യൽ മീഡിയയിൽ വീണ്ടും സജീവമാകുന്ന പശ്ചാത്തലത്തിലാണ് സിനിമാ പ്രവർത്തകർ ഈ വിവരം സ്ഥിരീകരിച്ചത്. ഒരു പുരുഷനൊപ്പം അനുഷ്ക നിൽക്കുന്ന ചിത്രം ‘സീക്രട്ട് സെറിമണി’യുടെ തെളിവ് എന്ന നിലയിലാണ് പലരും പങ്കുവയ്ക്കുന്നത്.
എന്നാൽ ഈ പ്രചരണങ്ങളിൽ യാതൊരു വാസ്തവവുമില്ലെന്ന് വ്യക്തമായിരിക്കുകയാണ്. സോഷ്യൽ മീഡിയയിൽ വൈറലായ ഈ ചിത്രം പുതിയതല്ല എന്നതാണ് വസ്തുത. എട്ടു വർഷം മുൻപ് നടന്ന ഫാഷൻ ഷോയ്ക്കിടെ റാംപിൽ ഒരു മോഡലിനൊപ്പം അനുഷ്ക പോസ് ചെയ്യുന്നതാണ് ചിത്രത്തിലുള്ളത്.
ഈ പഴയ ചിത്രമാണ് ഇപ്പോൾ താരത്തിന്റെ വിവാഹനിശ്ചയം കഴിഞ്ഞു എന്ന പേരിൽ തെറ്റായ രീതിയിൽ പ്രചരിക്കുന്നത്. ഇതിനു മുൻപും അനുഷ്കയുടെ വിവാഹത്തെക്കുറിച്ച് സമാനമായ അഭ്യൂഹങ്ങൾ പ്രചരിച്ചിരുന്നെങ്കിലും താരത്തിന്റെ ഔദ്യോഗിക വക്താക്കൾ അതെല്ലാം നിഷേധിച്ചിട്ടുള്ളതാണ്.
നിലവിൽ വിവാഹത്തെക്കുറിച്ചോ നിശ്ചയത്തെക്കുറിച്ചോ ഉള്ള യാതൊരു ഔദ്യോഗിക അറിയിപ്പും വന്നിട്ടില്ലെന്നും വൈറൽ പോസ്റ്റുകൾ തികച്ചും തെറ്റായ വിവരമാണെന്നും ഫിലിമി ഫിഗർ ഉൾപ്പെടെയുള്ള വസ്തുതാന്വേഷണ വിഭാഗങ്ങൾ സ്ഥിരീകരിച്ചു. പഴയ ദൃശ്യങ്ങളും ചിത്രങ്ങളും ഉപയോഗിച്ച് സോഷ്യൽ മീഡിയയിൽ വ്യാജ വാർത്തകൾ നിർമ്മിക്കുന്നത് പതിവാകുകയാണ്. ഇത്തരം വാർത്തകൾ വിശ്വസിക്കുന്നതിനോ പങ്കുവെക്കുന്നതിനോ മുൻപ് ആരാധകർ സത്യാവസ്ഥ പരിശോധിക്കണമെന്ന് ഫിലിമി ഫിഗർ ഓർമ്മിപ്പിക്കുന്നു.
നടിയുടെ വിവാഹനിശ്ചവുമായി ബന്ധപ്പെട്ട വ്യാജവാർത്തയിൽ ടീം ഔദ്യോഗിക പത്രക്കുറിപ്പും പുറത്തിറക്കിയിരുന്നു. അടിസ്ഥാനരഹിതമായ വാർത്തകൾ പ്രചരിപ്പിക്കുന്നത് മാധ്യമപ്രവർത്തനത്തിന്റെ പരിധി ലംഘിക്കുന്നതാണെന്ന് നടിയുടെ ടീം പ്രസ്താവനയിൽ ചൂണ്ടിക്കാട്ടി.
ഔദ്യോഗിക സ്ഥിരീകരണത്തിനായി കാത്തിരിക്കാതെ ഒരാളുടെ സ്വകാര്യ ജീവിതത്തെക്കുറിച്ചുള്ള കാര്യങ്ങൾ വാർത്തയാക്കുന്നത് വ്യക്തിസ്വാതന്ത്ര്യത്തിലേക്കുള്ള കടന്നുകയറ്റമാണ്. മാധ്യമങ്ങൾ ഉത്തരവാദിത്തബോധത്തോടെ പെരുമാറണമെന്നും വ്യക്തിയുടെ സ്വകാര്യത സംബന്ധിച്ച കാര്യങ്ങൾ ദൈനംദിന തലക്കെട്ടുകളാക്കി മാറ്റരുതെന്നും അവർ ആവശ്യപ്പെട്ടു.
സ്ത്രീകളെ ലക്ഷ്യമിട്ടുള്ള ഇത്തരം വാർത്തകളിൽ പലപ്പോഴും അവരുടെ പ്രായത്തെക്കുറിച്ചുള്ള അനാവശ്യമായ പരാമർശങ്ങൾ ഉണ്ടാകാറുണ്ട്. പുരുഷ അഭിനേതാക്കൾ ഇത്തരം ചോദ്യങ്ങൾ നേരിടേണ്ടി വരാറില്ല. എന്നാൽ നടിമാരുടെ പ്രായവും വിവാഹവും നിരന്തരം ചർച്ചയാക്കുന്നത് ലിംഗപരമായ വിവേചനമാണെന്നും പ്രസ്താവനയിൽ പറയുന്നു. ഇത് ഒരു തരത്തിലുള്ള ‘ഏജ് ഷെയ്മിംഗ്’ ആണെന്നും ഇതിനെതിരെ പ്രതികരിക്കേണ്ടതുണ്ടെന്നും ടീം വ്യക്തമാക്കി.തന്റെ കരിയറിലും വ്യക്തിജീവിതത്തിലും അന്തസ്സും മാന്യതയും എപ്പോഴും പുലർത്തുന്ന വ്യക്തിയാണ് അനുഷ്ക ഷെട്ടി.
പ്രശസ്തിക്ക് വേണ്ടി ഒരിക്കലും പബ്ലിസിറ്റി ഗിമ്മിക്കുകളെ അവർ ആശ്രയിച്ചിട്ടില്ല. തന്റെ സ്വകാര്യ ജീവിതം രഹസ്യമായി സൂക്ഷിക്കാൻ ആഗ്രഹിക്കുന്ന വ്യക്തിയാണ് അവർ. വിവാഹം എന്നത് ഒരാളുടെ തികച്ചും വ്യക്തിപരമായ തീരുമാനമാണെന്നും അതിനെ വാർത്തകൾക്കും ക്ലിക്കുകൾക്കും വേണ്ടി സെൻസേഷണലൈസ് ചെയ്യരുതെന്നും പ്രസ്താവനയിലുണ്ട്.
ഊഹാപോഹങ്ങൾ ഒരിക്കലും ഉത്തരവാദിത്തമുള്ള മാധ്യമപ്രവർത്തനത്തിന് പകരമാകില്ലെന്ന് ടീം ഓർമ്മിപ്പിക്കുന്നു. ഒരു വ്യക്തിയുടെ സ്വകാര്യതയെ മാനിക്കുക എന്നത് ഏറ്റവും പ്രധാനപ്പെട്ട കാര്യമാണ്. വിവാഹം പോലുള്ള കാര്യങ്ങളിൽ ഔദ്യോഗികമായ അറിയിപ്പ് വരുന്നത് വരെ മാധ്യമങ്ങൾ കാത്തിരിക്കണമെന്നും പറഞ്ഞുകൊണ്ടാണ് അവർ പ്രസ്താവന അവസാനിപ്പിക്കുന്നത്.
അതേസമയം മലയാളം സിനിമാ പ്രേമികൾ ഏറെ ആവേശത്തോടെ കാത്തിരിക്കുന്ന ‘കത്തനാർ: ദി വൈൽഡ് സോഴ്സറർ’, സുരേഷ് ഗോപിയുടെ ‘ഒറ്റക്കൊമ്പൻ’ എന്നീ ബിഗ് ബജറ്റ് ചിത്രങ്ങളിലൂടെ അനുഷ്ക ഷെട്ടി മലയാളത്തിൽ അരങ്ങേറ്റം കുറിക്കുകയാണ്. റോജിൻ തോമസ് സംവിധാനം ചെയ്യുന്ന ‘കത്തനാരി’ൽ നിഗൂഢത നിറഞ്ഞ കഥാപാത്രമായാണ് താരം എത്തുന്നത്. ജയസൂര്യ നായകനാകുന്ന ഈ ചിത്രം അത്യാധുനിക വെർച്വൽ പ്രൊഡക്ഷൻ സാങ്കേതികവിദ്യയിലാണ് ഒരുങ്ങുന്നത്.
