മുന് ബിഗ്ബോസ് താരം മുഹമ്മദ് ഡിലിജന്റ് ബ്ലെസ്ലിയെക്കുറിച്ച് വെളിപ്പെടുത്തലുമായി; നടി ലക്ഷ്മിപ്രിയ
മുന് ബിഗ്ബോസ് താരം മുഹമ്മദ് ഡിലിജന്റ് ബ്ലെസ്ലിയെക്കുറിച്ച് വെളിപ്പെടുത്തലുമായി സഹമത്സരാര്ത്ഥിയും നടിയുമായ ലക്ഷ്മിപ്രിയ. ബിഗ് ബോസില് കൂടെയുണ്ടായിരുന്നവരില് തനിക്ക് ഏറ്റവും കൂടുതല് വെറുപ്പുണ്ടായിരുന്നത് ബ്ലെസ്ലിയോടാണെന്നും അത് മാറ്റാന് കഴിയില്ലന്നും അവര് പറഞ്ഞു. റിയാസ് സലിം അല്ല ബ്ലെസ്ലി ആയിരുന്നു ഫേക്കെന്ന് പറഞ്ഞ ലക്ഷ്മിപ്രിയ ബിഗ് ബോസ് ആഫ്റ്റര് പാര്ട്ടിയില് ബ്ലെസ്ലി പുകവലിച്ചതിനെക്കുറിച്ചും കൂട്ടിച്ചേര്ത്തു.’ഞാന് എന്താണെന്ന് മനസിലാക്കിക്കൊടുക്കാന് ബിഗ് ബോസ് സഹായിച്ചു.
എന്നെ ഇഷ്ടമല്ലാത്തവരുണ്ടാകും. അവര് ഇഷ്ടപ്പെടേണ്ട. ഒരുപാട് നെഗറ്റീവൊന്നും എനിക്ക് ബിഗ് ബോസ് കൊണ്ട് ലഭിച്ചിട്ടില്ല. കൊച്ചുകുട്ടികള് പോലും എല്പി എന്ന് വിളിച്ച് ഇപ്പോഴും സ്നേഹം പ്രകടിപ്പിക്കാറുണ്ട്. ബിഗ് ബോസില് ഒപ്പമുണ്ടായിരുന്നവരില് ഏറ്റവും വെറുപ്പുള്ളത് ബ്ലെസ്ലിയോടാണ്. അതെനിക്ക് മാറ്റാന് കഴിയില്ല. ബ്ലെസ്ലിയുടെ പേരില് എന്തോ കേസ് വന്നില്ലേ. ജയിലില് അല്ലേ. ഫേക്ക് ആയ ഒരാള്ക്ക് ഒരുപാട് കാലം അങ്ങനെ ജീവിക്കാന് കഴിയില്ല. റിയാസ് ഒന്നും ഫേക്കല്ല. അങ്ങനെ തോന്നിയത് ബ്ലെസ്ലിയെ മാത്രമാണ്. അത് ഞാന് എപ്പോഴും പറയാറുണ്ട്.അവന് മദ്യത്തിനും മയക്കുമരുന്നിനും എല്ലാം എതിരാണെന്ന് പറഞ്ഞിരുന്നു.
ഇതേ ബ്ലെസ്ലി ബിഗ് ബോസ് ആഫ്റ്റര് പാര്ട്ടിയില് മൂന്ന് കുപ്പി ഷാംപെയ്ന് കഴിച്ചു. അത് കഴിക്കാന് അവന് കാണിക്കുന്ന ടെന്റന്സി ദൂരെ നിന്ന് ഞാന് കണ്ടു. അതിന് മുമ്പ് ചുമയുള്ളവര്ക്ക് കൊടുത്ത കഫ് സിറപ്പും അവന് കഴിച്ചു. ആഫ്റ്റര് പാര്ട്ടിയില് അവന് പുകവലിക്കുകയും ചെയ്തിരുന്നു. ഇതെല്ലാം ഞാന് കണ്ടതാണ്. ആരോടുവേണമെങ്കിലും നിങ്ങള്ക്ക് ചോദിക്കാം. ഇപ്പോള് ധന്യയും റോബിനുമായും മാത്രമേ എനിക്ക് ബന്ധമുള്ളു. മറ്റാരെയും കാണാന് പോലും ആഗ്രഹിച്ചിട്ടില്ല’ – ഒരു യൂട്യൂബ് ചാനലിന് നല്കിയ അഭിമുഖത്തില് ലക്ഷ്മിപ്രിയ പറഞ്ഞു.
അടുത്തിടെ കോഴിക്കോട് കൊടുവള്ളി കേന്ദ്രീകരിച്ച് നടത്തിയ വന് ഓണ്ലൈന് സാമ്പത്തിക തട്ടിപ്പ് കേസില് ബ്ലെസ്ലി അറസ്റ്റിലായിരുന്നു. ടെലഗ്രാം വഴി ജോലി വാഗ്ദാനം ചെയ്ത് പണം തട്ടി ക്രിപ്റ്റോ കറന്സികളാക്കി വിദേശത്ത് എത്തിച്ചെന്നാണ് ബ്ലെസ്ലിക്കെതിരായ കേസ്. സാമ്പത്തിക തട്ടിപ്പ് കേസിലെ മുഖ്യ കണ്ണികളില് ഒരാളാണ് ബ്ലെസ്ലിയെന്നും ക്രൈംബ്രാഞ്ച് കണ്ടെത്തിയിരുന്നു.
