അറ്റ്ലാന്റയിൽ ഫുട്ബോൾ ആവേശം; അർജന്റീനയുടെ ജയം ഗാലറിയിലിരുന്ന് ആസ്വദിച്ച് മോഹൻലാലും ഫഹദും!
ഫിഫ ലോകകപ്പ് ഫുട്ബോൾ സെമിഫൈനലിലെ അർജന്റീന-ഇംഗ്ലണ്ട് പോരാട്ടം കാണാൻ മലയാളത്തിന്റെ പ്രിയതാരങ്ങളായ മോഹൻലാലും ഫഹദ് ഫാസിലും അറ്റ്ലാന്റയിലെ മെഴ്സിഡസ് ബെൻസ് സ്റ്റേഡിയത്തിലെത്തി. മോഹൻലാലിനും ഫഹദിനും പുറമെ സംഗീതജ്ഞൻ സ്റ്റീഫൻ ദേവസ്സി, നിർമ്മാതാവ് ആന്റണി പെരുമ്പാവൂർ, ഡിസ്നി സ്റ്റാർ മുൻ മേധാവി കെ. മാധവൻ എന്നിവരും ഇവർക്കൊപ്പം ഗാലറിയിൽ കളി ആസ്വദിക്കാനുണ്ടായിരുന്നു.
നേരത്തെ, ഡാളസിൽ നടന്ന ഫ്രാൻസ്-സ്പെയിൻ ആദ്യ സെമിഫൈനൽ പോരാട്ടവും മോഹൻലാൽ നേരിട്ട് കണ്ടിരുന്നു. ഭാര്യ സുചിത്രയ്ക്കൊപ്പമാണ് അന്ന് താരം സ്റ്റേഡിയത്തിലെത്തിയത്. ലോകകപ്പ് ആവേശത്തിന്റെ ഭാഗമായി വിവിധ മത്സരങ്ങൾ നേരിട്ട് കാണാൻ മോഹൻലാൽ നേരത്തെ തന്നെ യുഎസിലേക്ക് യാത്ര തിരിച്ചിരുന്നു.
അത്യന്തം ആവേശം നിറഞ്ഞ മത്സരത്തിൽ ഇംഗ്ലണ്ടിനെ ഒന്നിനെതിരെ രണ്ട് ഗോളുകൾക്ക് പരാജയപ്പെടുത്തി അർജന്റീന ഫൈനലിലേക്ക് മുന്നേറി. മത്സരം അവസാനിക്കാൻ മിനിറ്റുകൾ മാത്രം ബാക്കിനിൽക്കെ രണ്ട് ഗോളുകൾ തിരിച്ചടിച്ചാണ് അർജന്റീന അവിശ്വസനീയ വിജയം സ്വന്തമാക്കിയത്. എൻസോ ഫെർണാണ്ടസ്, ലൗതരോ മാർട്ടിനസ് എന്നിവരാണ് അർജന്റീനയ്ക്കായി നിർണ്ണായക ഗോളുകൾ നേടിയത്.
