കൊച്ചി: വാഹനാപകടത്തിൽ അന്തരിച്ച നടൻ സന്തോഷ് നായരുടെ അപ്രതീക്ഷിത വിയോഗത്തിൽ അനുശോചനം രേഖപ്പെടുത്തി നടൻ Suraj Venjaramoodu. സിനിമയിൽ എത്തിയ കാലം മുതൽക്കേയുള്ള സൗഹൃദമായിരുന്നു സന്തോഷ് നായരുമായി ഉണ്ടായിരുന്നതെന്നും അദ്ദേഹത്തിന്റെ വേർപാട് വലിയ വേദനയുണ്ടാക്കുന്നതാണെന്നും സുരാജ് ഫേസ്ബുക്ക് കുറിപ്പിൽ വ്യക്തമാക്കി.
“രാവിലെ എഴുന്നേൽക്കുമ്പോൾ കേൾക്കുന്നത് സന്തോഷ് അണ്ണന്റെ വിയോഗവാർത്തയാണ്… ഞാൻ സിനിമയിൽ വന്ന കാലത്ത് അദ്ദേഹം വില്ലൻ വേഷങ്ങളിൽ തിളങ്ങി നിന്നിരുന്നു. കൂടെ അഭിനയിച്ചപ്പോൾ അദ്ദേഹത്തിന്റെ രസിക സ്വഭാവം മനസ്സിലായി. എപ്പോഴും ചിരിപ്പിച്ചു കൊണ്ടേയിരിക്കും,” എന്ന് സുരാജ് കുറിച്ചു.
‘മോഹിനിയാട്ടം’ സിനിമയാണ് ഇരുവരും ഒടുവിൽ ഒരുമിച്ച് അഭിനയിച്ചത്. ആ ചിത്രത്തിന്റെ സെറ്റിൽ പങ്കിട്ട നിമിഷങ്ങൾ എല്ലാം ചിരികളാൽ നിറഞ്ഞതായിരുന്നുവെന്നും അദ്ദേഹം ഓർമ്മിച്ചു.
“അത്യധികം വേദനയോടെ വിട,” എന്നാണ് സുരാജ് കുറിപ്പ് അവസാനിപ്പിച്ചത്.
വാഹനാപകടത്തെത്തുടർന്നായിരുന്നു സന്തോഷ് നായരുടെ അന്ത്യം. സിനിമയിലെ സഹപ്രവർത്തകരും ആരാധകരും ഉൾപ്പെടെ നിരവധി പേരാണ് അദ്ദേഹത്തിന് ആദരാഞ്ജലികൾ അർപ്പിക്കുന്നത്.
