തെലുങ്ക് വിജയ് ദേവരകൊണ്ടയും സംവിധായകൻ ശൗര്യവും ഒന്നിക്കുന്ന ബിഗ് ബജറ്റ് ചിത്രം ഔദ്യോഗികമായി പ്രഖ്യാപിച്ചു. ഇതുവരെ കണ്ടിട്ടില്ലാത്ത വിധം തികച്ചും വ്യത്യസ്തമായ ഒരു രൂപത്തിലാണ് വിജയ് ഈ ചിത്രത്തിൽ പ്രത്യക്ഷപ്പെടുന്നത്. പുറത്തുവിട്ട പ്രഖ്യാപന പോസ്റ്ററിൽ, നാല് വേട്ടനായ്ക്കളെ ചങ്ങലയിൽ ബന്ധിച്ചു മുന്നോട്ട് നയിക്കുന്ന വിജയ് ദേവരകൊണ്ടയുടെ തീക്ഷ്ണമായ ഭാവം ആരാധകരിൽ വലിയ ആകാംക്ഷയാണ് ജനിപ്പിച്ചിരിക്കുന്നത്. ഹായ് നാനാ എന്ന തന്റെ ആദ്യ ചിത്രത്തിലൂടെ പ്രേക്ഷക ഹൃദയം കീഴടക്കിയ ശൗര്യ, ഇത്തവണ കൂടുതൽ ആഴമുള്ളതും മിത്തോളജിക്കൽ പശ്ചാത്തലമുള്ളതുമായ ഒരു കഥാപരിസരമാണ് ഒരുക്കിയിരിക്കുന്നത്.
ഒരു സമാന്തര മിത്തോളജിക്കൽ ലോകത്താണ് ഈ സിനിമയുടെ കഥ നടക്കുന്നത്. പുരാതനമായ സ്പർശമുണ്ടെങ്കിലും പൂർണ്ണമായും സങ്കൽപ്പത്തിലധിഷ്ഠിതമായ ഒരു പുതുലോകമാണ് സംവിധായകൻ ഇതിലൂടെ സൃഷ്ടിക്കുന്നത്. ചിത്രത്തിന്റെ പ്രഖ്യാപനത്തോടൊപ്പം പുറത്തിറക്കിയ “അത് ഒരു ഗർജ്ജനമാണ്” എന്ന തീം ഗാനം ഇതിനകം തന്നെ ശ്രദ്ധേയമായി കഴിഞ്ഞു. ജീവിതത്തിലെ പരാജയങ്ങളെയും വെല്ലുവിളികളെയും അതിജീവിച്ച് മുന്നേറാനുള്ള ആത്മവിശ്വാസമാണ് ഈ ഗാനം പകരുന്നത്. ഓരോ മനുഷ്യന്റെയും ഉള്ളിലുള്ള അതിജീവനത്തിന്റെ ശക്തിയെയാണ് ഗർജ്ജനം എന്ന് സിനിമ വിശേഷിപ്പിക്കുന്നത്.
ലോകോത്തര നിലവാരത്തിലുള്ള സാങ്കേതിക വിദഗ്ധരുടെ ഒരു വലിയ നിര തന്നെ ഈ ചിത്രത്തിന് പിന്നിലുണ്ട് എന്നതാണ് ഏറ്റവും വലിയ സവിശേഷത. ഹൗസ് ഓഫ് ദി ഡ്രാഗൺ പോലുള്ള അന്താരാഷ്ട്ര പരമ്പരകളിൽ പ്രവർത്തിച്ച അലെജാന്ദ്രോ മാർട്ടിനസ് ആണ് ഛായാഗ്രഹണം നിർവഹിക്കുന്നത്. വിഷ്വൽ എഫക്ട്സിനായി ‘ബാറ്റ്മാൻ ഫോറെവർ’ പോലുള്ള ഹോളിവുഡ് ചിത്രങ്ങളുടെ അണിയറപ്രവർത്തകനായ എറിക് ഡർസ്റ്റ് എത്തുമ്പോൾ, ആർട്ട് ഡയറക്ഷൻ കൈകാര്യം ചെയ്യുന്നത് ‘അനിമൽ’ സിനിമയിലൂടെ ശ്രദ്ധേയനായ സുരേഷ് സെൽവരാജ് ആണ്. മലയാളി സംഗീത സംവിധായകൻ ഹിഷാം അബ്ദുൽ വഹാബാണ് ചിത്രത്തിനായി ഈണങ്ങൾ ഒരുക്കുന്നത്.
വിജയ് ദേവരകൊണ്ടയുടെ കരിയറിലെ തന്നെ ഏറ്റവും വലിയ പരീക്ഷണങ്ങളിലൊന്നായി ഈ ചിത്രം മാറുമെന്നാണ് കരുതപ്പെടുന്നത്. പ്രവീൺ ആന്റണിയുടെ എഡിറ്റിംഗും സച്ചിൻ ലോവലേക്കറുടെ വസ്ത്രാലങ്കാരവും ചിത്രത്തിന്റെ ദൃശ്യമികവിന് മാറ്റുകൂട്ടും. “ഡ്രീം കളക്ടീവ്” എന്ന് വിശേഷിപ്പിക്കപ്പെടുന്ന ഈ ടീം, ആഗോള തലത്തിൽ ശ്രദ്ധിക്കപ്പെടുന്ന ഒരു സിനിമാറ്റിക് അനുഭവം പ്രേക്ഷകർക്ക് സമ്മാനിക്കാൻ ലക്ഷ്യമിടുന്നു. പ്രഖ്യാപന പോസ്റ്റർ നൽകുന്ന സൂചനകൾ പ്രകാരം, ഒരു ‘ബിഗ് ബാംഗർ’ ചിത്രത്തിനായി കാത്തിരിക്കുകയാണ് സിനിമാ ലോകം.
