മലയാള സിനിമയുടെ ബോക്സ് ഓഫീസ് ചരിത്രം തിരുത്തിക്കുറിച്ചു കൊണ്ട് ‘വാഴ 2′ മുന്നേറുകയാണ്. പ്രമുഖ താരങ്ങളുടെ സാന്നിധ്യമില്ലാതെ, മികച്ച ഉള്ളടക്കം മാത്രം കൈമുതലാക്കി എത്തുന്ന ചിത്രങ്ങളെ ഇരുകൈയ്യും നീട്ടി സ്വീകരിക്കുന്ന മലയാളി പ്രേക്ഷകരുടെ ശീലം ഈ ചിത്രത്തിന്റെ വിജയത്തിലൂടെ ഒരിക്കൽ കൂടി തെളിയിക്കപ്പെട്ടിരിക്കുന്നു. വിപിൻ ദാസിന്റെ രചനയിൽ നവാഗതനായ സവിൻ സ സംവിധാനം ചെയ്ത ഈ ചിത്രം, പുതുമുഖ താരങ്ങളെ അണിനിരത്തിക്കൊണ്ട് മലയാള സിനിമയിലെ വമ്പൻ റെക്കോർഡുകളാണ് ഇപ്പോൾ സ്വന്തം പേരിലാക്കിയിരിക്കുന്നത്.
കേരളത്തിൽ നിന്ന് മാത്രം 100 കോടി ഗ്രോസ് നേട്ടം കൈവരിക്കുന്ന മൂന്നാമത്തെ ചിത്രം എന്ന ചരിത്ര നേട്ടമാണ് വാഴ 2 സ്വന്തമാക്കിയിരിക്കുന്നത്. ‘തുടരും’, ‘ലോക’ എന്നീ ചിത്രങ്ങളാണ് ഇതിന് മുൻപ് ഈ നാഴികക്കല്ല് പിന്നിട്ടത്. എന്നാൽ, മോഹൻലാൽ ചിത്രമായ ‘തുടരും’ 19 ദിവസം കൊണ്ട് നേടിയ ഈ റെക്കോർഡ് വെറും 16 ദിവസം കൊണ്ട് മറികടന്ന വാഴ 2, കേരളത്തിൽ ഏറ്റവും വേഗത്തിൽ 100 കോടി ക്ലബ്ബിലെത്തുന്ന ചിത്രം എന്ന ഖ്യാതിയും നേടി. ബിഗ് ബഡ്ജറ്റ് ചിത്രങ്ങളെയും സൂപ്പർതാര ചിത്രങ്ങളെയും പിന്നിലാക്കി ഒരു പുതുമുഖ ചിത്രം ഇത്തരത്തിൽ കുതിക്കുന്നത് സിനിമാ ലോകത്തെ അമ്പരപ്പിച്ചിരിക്കുകയാണ്.
ആഗോള ബോക്സ് ഓഫീസിലും ചിത്രം തരംഗം സൃഷ്ടിക്കുകയാണ്. ഇതിനോടകം 186.90 കോടി രൂപ ആഗോള തലത്തിൽ നേടിയ ചിത്രം 200 കോടി ക്ലബ്ബിലേക്കുള്ള ദൂരം കുറയ്ക്കുകയാണ്. വിഷു റിലീസുകൾ തിയേറ്ററുകളിൽ എത്തിയിട്ടും മികച്ച ഒക്കുപ്പൻസിയോടെ വാഴ 2 പ്രദർശനം തുടരുന്നത് ചിത്രത്തിനുള്ള വലിയ ജനപ്രീതിയാണ് കാണിക്കുന്നത്. നിലവിലെ ഇൻഡസ്ട്രി ഹിറ്റായ ‘ലോക’യെ മറികടന്ന് മലയാളത്തിലെ ഏറ്റവും വലിയ വിജയമായി വാഴ 2 മാറുമോ എന്നാണ് ഇപ്പോൾ സിനിമാ പ്രേമികൾ ആകാംക്ഷയോടെ നോക്കിക്കാണുന്നത്.
