ഫാഷൻ ലോകത്തെ എന്നും വിസ്മയിപ്പിക്കുന്ന താരമാണ് പ്രിയങ്ക ചോപ്ര. തന്റെ പുതിയ ചിത്രമായ ‘ദ ബ്ലഫ്’ന്റെ പ്രമോഷൻ തിരക്കുകളിലാണ് താരം ഇപ്പോൾ. ഈ അവസരത്തിൽ പ്രിയങ്ക പങ്കുവെച്ച പുതിയ ചിത്രങ്ങളാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. ചാർക്കോൾ ഗ്രേ നിറത്തിലുള്ള കോർസെറ്റഡ് ബ്ലേസറും മാച്ചിംഗ് ട്രൗസറും ധരിച്ചെത്തിയ പ്രിയങ്കയുടെ ലുക്ക് ആരാധകർക്കിടയിൽ ചർച്ചയായിക്കഴിഞ്ഞു.
പവർ ഡ്രസ്സിംഗിന്റെ കാര്യത്തിൽ പ്രിയങ്കയെ വെല്ലാൻ മറ്റാരുമില്ലെന്ന് തെളിയിക്കുന്നതായിരുന്നു താരത്തിന്റെ പുതിയ വേഷം. ചാർക്കോൾ ഗ്രേ നിറത്തിലുള്ള കോർസെറ്റഡ് ബ്ലേസർ താരത്തിന് ഒരു ‘ബോൾഡ് ആൻഡ് ഫിയേഴ്സ്’ ലുക്ക് നൽകി. ബ്ലേസറിനുള്ളിൽ കറുത്ത ലേസ് ടോപ്പാണ് പ്രിയങ്ക ധരിച്ചിരുന്നത്. ബ്ലേസറിന്റെ വശങ്ങളിലുള്ള ലേസ്-അപ്പ് ഡിസൈനും പെപ്ലം സ്റ്റൈൽ ഫ്ലെയറും ഔട്ട്ഫിറ്റിന് കൂടുതൽ ഭംഗി നൽകുന്നു.
തന്റെ സ്വാഭാവിക സൗന്ദര്യത്തിന് പ്രാധാന്യം നൽകുന്ന മിനിമൽ മേക്കപ്പാണ് പ്രിയങ്ക തിരഞ്ഞെടുത്തത്. മുടി പാതി കെട്ടിവെച്ചുള്ള ഹെയർസ്റ്റൈലും മുടിയുടെ ബർഗണ്ടി നിറവും താരത്തിന്റെ ലുക്കിന് പൂർണ്ണത നൽകി. ലളിതമായ നെക്ലേസ്, സ്റ്റേറ്റ്മെന്റ് മോതിരങ്ങൾ, കറുത്ത സൺഗ്ലാസ് എന്നിവയായിരുന്നു ആക്സസറികൾ. ഉയരമുള്ള കറുത്ത ബൂട്ടുകൾ താരത്തിന്റെ ലുക്ക് വർദ്ധിപ്പിച്ചു.
‘ദി ബ്ലഫ്’ എന്ന ചിത്രത്തിൽ ഒരു കടൽക്കൊള്ളക്കാരിയുടെ വേഷത്തിലാണ് പ്രിയങ്ക എത്തുന്നത്. ചിത്രത്തിന്റെ പ്രമോഷൻ ചടങ്ങുകളിൽ താരം ധരിക്കുന്ന വസ്ത്രങ്ങളെല്ലാം തന്നെ ആ കഥാപാത്രത്തിന്റെ സ്വഭാവത്തോട് ചേർന്നുനിൽക്കുന്നവയാണ്. പുതിയ മോണോക്രോമാറ്റിക് ലുക്കിലും ആ ‘പൈറേറ്റ് വൈബ്’ നിഴലിക്കുന്നുണ്ടെന്ന് ഫാഷൻ വിദഗ്ധർ അഭിപ്രായപ്പെടുന്നു.
