നിറവയറില്‍ ഫോട്ടോഷൂട്ടുമായി നടി ദുര്‍ഗകൃഷ്ണ. അത്തം ദിനാശംസകള്‍ നേര്‍ന്നു കൊണ്ടാണ് ഏറ്റവും പുതിയ ഫോട്ടോഷൂട്ട് ചിത്രങ്ങള്‍ നടി പങ്കുവച്ചത്. ഭര്‍ത്താവ് അര്‍ജുനെയും ചിത്രങ്ങളില്‍ കാണാം. ഐറ ഫൊട്ടോഗ്രഫിയാണ് ചിത്രങ്ങള്‍ പകര്‍ത്തിയിരിക്കുന്നത്.
ജൂണ്‍ മാസത്തിലാണ് താന്‍ അമ്മയാകാന്‍ ഒരുങ്ങുന്നുവെന്ന സന്തോഷ വാര്‍ത്ത താരം ആരാധകരെ അറിയിച്ചത്. 2021 ഏപ്രിലില്‍ ആയിരുന്നു ദുര്‍ഗ കൃഷ്ണയും നിര്‍മാതാവും ബിസിനസുകാരനുമായ അര്‍ജുനുമായുള്ള വിവാഹം. നാലു വര്‍ഷങ്ങള്‍ക്കിപ്പുറം ജീവിതത്തിലേക്ക് പുതിയൊരു അതിഥി കൂടിയെത്തുന്ന സന്തോഷത്തിലാണ് ദുര്‍ഗയും അര്‍ജുനും.
വിവാഹ ശേഷവും ദുര്‍ഗ സിനിമയില്‍ സജീവമാണ്. വിമാനം എന്ന സിനിമയിലൂടെ അഭിനയ രംഗത്തെത്തിയ താരമാണ് ദുര്‍ഗ. പ്രേതം 2, ഉടല്‍, ലവ് ആക്ഷന്‍ ഡ്രാമ എന്നിവയാണ് പ്രധാന സിനിമകള്‍.
എം.എ. നിഷാദ് സംവിധാനം ചെയ്ത ‘ഒരു അന്വേഷണത്തിന്റെ തുടക്കം’ എന്ന ചിത്രത്തിലാണ് അവസാനം പ്രത്യക്ഷപ്പെട്ടത്.
